توقف كثيرون عند قرار نيابة أمن الدولة العليا، منع توفيق عكاشة، مالك قناة الفراعين، من
مغادرة البلاد، ووضعه على قوائم الممنوعين من السفر، وسط تحقيقات في البلاغات التي
تتهم عكاشة بالتحريض على قتل الرئيس محمد مرسي وقلب نظام الحكم من خلال القناة التي
يمتلكها.
وأقول لهؤلاء: يا جماعة هو فيه حد ياخد على
كلام عكاشة؟!
ده عكاشة
ده
راجل طيب على باب الله فاتح قناة سبوبة أو فضفضة... أمانة عليكم ما تبهدلوه ده
غلبان في دماغه ... اقفلوا القناة بس عشان ميقرفناش في عيشتنا والبلد مش ناقصة صداع راس
بلاش تحبسوه ينوبكم ثواب. سيبوه وبكره مسيره
يعقل وإحنا عارفين إن دمه محروق من الإخوان من ساعة ما سقط في الانتخابات فبيفضفض
والناس بتاخده على قد عقله وخلاص .. وبعدين أحياناً بيكون مسلي وبيضحك، هو والست حياة
الدرديري الله يكرمها كما يكرم حانوتي الموتى.. معلش سيبوه وبجملة الفوضى اللي في
البلد يعني هتيجي على عكاشة وتقف؟
أنتم فاكرين كلامه خلال لقائه -مع المذيعة حياة
الدرديري ضمن تغطية القناة لليوم الأخير وعمليات فرز الأصوات للانتخابات الرئاسية،
عندما قال :"أنا نفسيتي زفت ومن اليوم بدأت أجهز نفسي للسفر، أنا بدأت الم هدومي
وناوي أمشى خلاص بعد الانتخابات دي لأن الشعب خذلني ومرحوش الانتخابات"، موجهـًا
انتقاده بألفاظ لاذعة للشعب ملقيـًا اللوم علي الناخبين لعدم نزلوهم للتصويت لصالح
المرشح الرئاسي أحمد شفيق، قائلاً "الله يخرب بيوتكم خدتوا الأجازة وروحتم المصايف
ومنزلتوش تنتخبوا شفيق".
الفراعين، الملاعين، المواعين.. كله ماشي في
زمن حزب النور والكهرباء المقطوعة!
